Nan Kè mwa mas la, pandan tout moun ap mete kostim mawon sou yo pou ensekirite kap vale teren pa bò isit, Gazzman koulè debake ak djaz li nan peyi a san okenn moun pa t atann ak sa.
Yon toune nèf jou, sèt pèfòmans nan sèt zòn diferan: Beladè, Lenbe, Fò Libète, Las Kawobas, Vèrèt, Gonayiv ak Sen Mak.

Daprè sa Gazzman eksplike pandan pasaj li nan Carel in the morning, toune sa a pa tap ka posib san manadjè Baboo: “sèl bagay mwen te vin fè se vin jwe, vin chante. Tout sa ki fèt la se manadjè a. Baboo te gen yon plan e li te kwè ladan l, kote menm mwen m te di l se pa bagay ki janm fèt pou djaz ale Ayiti mwa mas. Se toujou ete ak fen ane”, antouka manadjè a te wè lwen e li te wè byen.

Toune sila se yon veritab siksè pou Disip. Yon foul moun debake pou vin pran plezi ak djaz la, ou ta ka remake swaf piblik la te genyen an e sa te menm jan an pou chak kote djaz la te pase pandan toune sa . Nan moman sa a, menm si se te sèlman pou sware a, ou santi fanatik yo te bliye pwoblèm yap andire nan peyi a.
Kè kontan djaz la te afiche sou vizaj chak grenn mizisyen e chantè vedèt la te pran plezi amize l ak fanatik li yo kote li te ouvri mikwo l bay jèn yo pou yo vin chante: <<Mwen rete kwè, janm te di l deja nan yon mizik, kwè m si w vle gen yon ti Gazzman koulè an Ayiti, yon Gracia Delva…Mwen te fanatik Top Vice e Freddy se te premye moun ki te lonje mikwo ban mwen se sa ki fè mwen panse li nesesè pou m lonje mikwo bay lòt moun tou, ou pa janm konnen>>, se konsa Gazzy te kontinye eksplike nan emisyon an rezon ki fè mikwo l toujou disponib pou tout moun.

Toune sila a montre a klè lakay se lakay e lakay pa sèlman Pòtoprens. Lanmou Disip jwenn nan pa sèlman soti Gonayiv nan vil kote Gazzman koulè fèt men tout kote djaz la te pase yo. Toune a pwouve tou anvi viv ki gen nan peyi a malgre tout difikilte moun yo ap konnen.
Si, apre sa Disip sot fè pandan 9 jou toune sila a, konsène yo pa remake ti pèp la anvi respire, anvi soti pou yal pran ti plezi yo, konnen yon fwa an plis yo konfime yo pa moun.

Leave a Reply

Your email address will not be published.